Über z Neujahr isch es wider einisch uf Norwege gange.
Hie si mer grad im Autozug nach Hamburg. Dr Lars isch wohl dä gsi wo am beschte het gschlafe!
Nach dr Fahrt dür Dänemark si mer z Hirtshals uf d Superspeed vor ColorLine umgstige - u scho simer z Vidaråsen gsi.
Nach em trischte Dänemark het üs Norwege mit emne Märliwinter i Empfang gno. Vidaråsen isch töif verschneit gsi mit bitter chalte Temperature.
D Nächt si stärneklahr gsi u dr Vollmond het alles ines gheimnisvolls Liecht ghüllt.
Me het sech nid chönne gnueg luege a de vilne Stärne.....
Aui zäme hei mer ä Usflug uf Larvik gmacht.....
I de Buchte isch z Meer zuegfrohre gsi. Dusse hei sech die verschneite Schäre im beschte Liecht präsentiert.
Das isch dr Bewis, das es meh als nume chalt isch gsi!
Üse Chlinscht het bi de Grosseltere chönne blibe - die Junge si ir Umgäbig vo Vidaeåsen ga Langlöifle.
I de Täler u im Schatte isch d Temperatur no einisch i Chäller gheit...
....weme sech bewegt het isch es einigermasse so gange...
.....aber es isch eifach wunderschön gsi. Mir si eifach verwöhnt worde mit däm Märliwätter.
Dr Lars het sech ar Wermi schlau gmacht!
Silvester isch vor der Tür gstande. Ir Halle hets es Unterhaltigsprogramm gä inklusive dr Red vom Chünig vo Norwege. Ds Apéro isch vo allne gnosse worde. Hie verschlingt ds Grosschind mit em Grossätti grad es Lachsbrötli!
Nach em Apéro hets e Fackeleumzug dür z Dorf gä. Bim Altersheim het me Haut gmacht u isch ade Bewohner ga singe.
Dr Lars nimmt si letsch Schoppe im alte Jahr gärn vom Grossmueti.
Dusse hei mer ds nöije Jahr mit Füür u Sekt gfiiret.
Am Nöijahrstag hi mer ä Usflug id Karistua gmach...
Äs het warme Kafi gä mit Fürstekakker u füre Lars dr Zmittagsbrei.
Heimelig isch si die Karistua; a de Fänschter glitzere Isblueme.
Ou bim Grossätti nimmt me dr Schoppe ganz gärn - da cha me guet schlafe!
Hie gömer nach Vesterøya - guet ipackt, äs isch immer no bitter chalt gsi.
Wunderbare Usblick vor Vesterøya übere Skagerak.
Dr Lars het ä Grosseltere Tag gnosse u mir si a zuegfrohrnige Trollvann ga Langlöifle.
Liechts Farbespiel im Schnee...
Genial, dür die verschneite Wälder chönne z gleite.
Ä churzi Rascht bevor z grosse Spure het agfange.
D Spur isch fertig gsi - so hei mer dr Räscht vor Tour sälber gspuret. Mit Langlaufskis so es Unterfange..
Dank Wägpünkt ade Böim hei mer dr Wäg us däm Labyrint problemlos gfunde.
Dr Lars het sider dr Tag bi de Grosseltere i volle Züg gnosse!
Tønsberg Hafen - ou hie isch ds Meer düregfrohre.
Winterlech isch dr Hafe.
Churz vorem alte Tønsberg - uf em Wäg ufts Schlossfjell...
Schlossfjell. Die mieschti Zyt z Norwege hei mer setigs Wätter gah - so söttis immer si :-))
Oslo im Winter. Ei Tag nach Tønsberg het z Wätter ä Usnahm gmacht.
Schön am gwohnte Platz: Marineschiff M314 im Hafe vo Oslo
Wätterbesserig über em Oslofjord
Langsam müesse mir wider Abschid näh - letschte Spatziergang dür Vidaråsen und em Kulpencheer.
Usglassenes letschts Znacht - mir wette alli lenger blibe...
Mir warte am Morge am sibni ufz Verlade .....
Dr Lars füert üs souverän dürz Warte..
Abschied vo Norwege. Achti am Morge - äs Taget langsam. So schön wie die ganze Ferie si gsi; so schön höre si ou....
Die Norwegischi Küschte verschwindet langsam us üsem Blickfäud - bis zum nächste Mau!
Keine Kommentare:
Kommentar veröffentlichen